Luke 7

Ukholo Lwenduna Yekhulu

1Kwathi uJesu eseqedile ukukhuluma konke lokhu abantu labo besizwa wayangena eKhaphenawume. 2Khonapho inceku yenduna yekhulu eyayiligugu kakhulu enkosini yayo, yayigula isilengela ekufeni. 3Induna yekhulu yezwa ngoJesu yathuma kuye abanye abadala babaJuda icela ukuba eze azosilisa inceku yayo.

4Bafika kuJesu bamncenga kakhulu bathi, “Indoda le ifanele ukuthi uyenzele lokhu, 5ngokuba iyasithanda isizwe sakithi njalo yiyo eyakha isinagogi yethu.”

6Ngakho uJesu wahamba labo. Wayengasekhatshana lendlu lapho induna yekhulu yathuma abangane bayo ukuyakuthi kuye, “Nkosi, ungazihluphi, akungifanelanga mina ukuthi ungene ngaphansi kophahla lwami. 7Yikho okwenze ukuthi ngingazake nginakane ukuthi ngize kuwe. Kodwa tshono ilizwi nje, inceku yami izasila. 8Ngokuba mina ngokwami ngingumuntu olawulayo, ngilamabutho angaphansi kwami. Lo ngimtshela ngithi, ‘Hamba,’ ahambe; kuloyana ngithi, ‘Woza,’ eze. Ngingathi encekwini yami, ‘Yenza lokhu,’ ikwenze.”

9UJesu wathi ekuzwa lokhu, wamangala ngaye, wasephendukela exukwini labantu ababemlandela wathi, “Ngiyalitshela, kangikaluboni ukholo olukhulu kangaka kanye lako-Israyeli.”

10Abantu ababethunyiwe babuyela endlini bafica inceku isiziphilela.

UJesu Uvusa Indodana Yomfelokazi

11Kungakabi yisikhathi eside ngemuva kwalokhu, uJesu waya edolobheni okwakuthiwa yiNayini, abafundi bakhe kanye lexuku labantu elikhulu babehamba laye. 12Wathi esebanga entubeni yedolobho, khonapho umuntu ofileyo wayethwelwe ekhutshelwa ngaphandle – eyiyo yodwa indodana kanina wayo, lowonina engumfelokazi. Ixuku elikhulu labantu bedolobheni lalilaye. 13Kwathi uJesu embona umfelokazi, wamzwela usizi wathi kuye, “Ungakhali.”

14Wasesondela wathinta ithala elalilesidumbu, kwathi labo ababelithwele bema mpo. Wathi, “Jaha, ngithi kuwe vuka!” 15Indoda efileyo yavuka yahlala, yasikhuluma, uJesu wayinika unina.

16Bonke bagcwala ukwesaba badumisa uNkulunkulu. Bathi, “Umphrofethi omkhulu usevelile phakathi kwethu. UNkulunkulu usefikile ukuzasiza abantu bakhe.” 17Udumo lukaJesu lwamemetheka kulo lonke elaseJudiya, lemmangweni wakhona.

UJesu LoJohane UMbhaphathizi

18Abafundi bakaJohane bamtshela ngazo zonke lezi izinto. Wabiza ababili kubo 19wabathuma eNkosini ukuyabuza ukuthi, “Unguye yini owayesiza, kumbe silindele omunye na?”

20Amadoda lawo athi efika kuJesu athi, “UJohane uMbhaphathizi usithumile kuwe ukuthi sizobuza sithi, ‘Unguye yini obezakuza kumbe silindele omunye’?”

21Ngasona leso sikhathi uJesu wasilisa abanengi ababelezifo, lemikhuhlane lemimoya emibi, wathungulula iziphofu ezinengi.

22Waseziphendula izithunywa wathi, “Buyelani liyobikela uJohane elikubonileyo lelikuzwileyo: Iziphofu zenziwa zibone, abaqhulayo bayahamba, labo abalobulephero bayasiliswa, izacuthe ziyezwa, abafileyo bayavuswa lezindaba ezinhle ziyatshunyayelwa kubayanga. 23Ubusisiwe lowomuntu ongakhubekiyo ngenxa yami.”

24Sezihambile izithunywa zikaJohane uJesu wakhuluma ebantwini ngoJohane wathi: “Laphuma lisiyabonani enkangala na? Umhlanga uzunguzwa ngumoya na?

25Kungayisilokho, pho lalisiyabonani? Indoda ececileyo ngezigqoko ezinhle na? Hatshi, labo abagqoka izigqoko ezidulayo bazitike ngezinto ezinhle basezigodlweni. 26Kodwa kanti kuyini elaphuma lisiyakubona? Umphrofethi yini? Yebo, ngiyalitshela, omkhulu kulomphrofethi. 27Nguye lowo okulotshwe ngaye ukuthi: “ ‘Ngizathuma isigijimi sami phambi kwakho, esizalungisa indlela yakho phambi kwakho.’

28Ngiyalitshela ukuthi kubo abazalwa ngabesifazana kakho omkhulu kuloJohane; ikanti lowo omncinyane kakhulu embusweni kaNkulunkulu mkhulu kulaye.”

29(Bonke abantu, kanye labathelisi, bathi sebewazwile amazwi kaJesu bavuma ukuthi indlela kaNkulunkulu yayilungile, ngoba babebhaphathizwe nguJohane. 30Kodwa abaFarisi lezazi zomthetho bayala injongo kaNkulunkulu ngabo, ngokuba babengabhaphathizwanga nguJohane.)

31“Pho ngingabalinganisa lani abantu balesi isizukulwane? Bafana lani? 32Banjengabantwana abahlezi emsikeni wokuthengisela bememezana besithi: “ ‘Salitshayela umhubhe, kalaze lagida salihlabelela isikhalo, kodwa kalililanga.’

33Ngoba uJohane uMbhaphathizi weza engadli isinkwa njalo enganathi iwayini, lina bese lisithi, ‘Uledimoni.’ 34INdodana yoMuntu yeza, yadla yanatha, laselisithi, ‘Nansi isiminzi lesidakwa, umngane wabathelisi lezoni.’ 35Kodwa ukuhlakanipha kubonakaliswa ukuthi kuqondile yibo bonke abantwana bakho.”

UJesu Ugcotshwa Ngumfazi Oyisoni

36Omunye wabaFarisi wanxusa uJesu ukuzakudla laye okwakusihlwa, ngakho waya endlini yalowo mFarisi wahlala weyama etafuleni.

37Kwathi owesifazana othile owayephila impilo yesono kulelodolobho esezwile ukuthi uJesu wayesidla endlini yomFarisi weza ephethe umfuma wamakha, 38kwathi esemi ngemuva kukaJesu ngasezinyaweni ekhala, wamanzisa izinyawo zakhe ngezinyembezi. Wasezesula izinyawo zikaJesu ngezinwele zakhe, wazanga wasethela amakha kuzo.

39Kwathi lowomFarisi owayemnxusile ekubona lokho wazitshela wathi, “Aluba indoda le ibingumphrofethi, ibizakwazi ukuthi ngubani oyicumbacumbayo lokuthi ungumfazi onjani – ukuthi uyisoni.”

40UJesu wamphendula wathi, “Simoni, kukhona engifuna ukukutshela khona.” Wathi, “Ngitshela, mfundisi.”

41“Amadoda amabili ayelesikwelede semali kumeboleki wemali. Oyedwa wayelesikwelede samadenariyu angamakhulu amahlanu, omunye esamatshumi amahlanu. 42Bobabili babengelayo imali yokumbhadala, ngakho wasewucitsha umlandu wabo bobabili. Manje nguwuphi wabo ozamthanda okudlula omunye na?”

43USimoni waphendula wathi, “Ngibona kungathi ngulowo owaxolelwa isikwelede esikhulu.” UJesu wathi, “Ubone kuhle.”

44Wasephendukela kowesifazana wathi kuSimoni, “Uyambona na owesifazana lo? Ngifikile endlini yakho, kawungiphanga amanzi ezinyawo zami, kodwa yena uthambise izinyawo zami ngezinyembezi zakhe, wazesula ngezinwele zakhe. 45Kawunganganga, kodwa owesifazana lo selokhu ngingenileyo lapha akemanga ukwanga izinyawo zami. 46Kawuthelanga amafutha ekhanda lami, kodwa yena uthele amakha ezinyaweni zami. 47Yikho-ke ngiyakutshela ukuthi izono zakhe ezinengi sezithethelelwe – ngokuba utshengise uthando olukhulu. Kodwa lowo othethelelwe okuncinyane uthanda kancinyane.”

48UJesu wasesithi kowesifazana, “Izono zakho sezithethelelwe.”

49Ezinye izethekeli zasezibuzana zisithi, “Ungubani kanti yena lo oze athethelele izono na?”

50UJesu wasesithi kowesifazana, “Ukukholwa kwakho kukusindisile; hamba ngokuthula.”